Bakı Ali Neft Məktəbində “Məzun günü” keçirilib.
Tehsilyenilikleri.az saytı xəbər verir ki, tədbir Azərbaycan Respublikasının Dövlət Himninin səsləndirilməsi ilə başlayıb.
Bakı Ali Neft Məktəbinin rektoru Elmar Qasımov əlamətdar gün münasibətilə məzunları təbrik edərək onlara gələcək həyat və peşə fəaliyyətlərində uğurlar arzulayıb.
Fəaliyyətə başladığı gündən bu təhsil ocağının yüksək ixtisaslı, ingilisdilli peşəkar kadrlar hazırlamaq missiyasını uğurla yerinə yetirdiyini deyən rektor ümumilikdə 168 tələbənin təhsilini başa vurduğunu bildirib. Rektor onların ölkəmizi layiqincə təmsil edəcəyinə əminliyini ifadə edib.
Tədbirdə çıxış edən SOCAR-ın birinci vitse-prezidenti, akademik Xoşbəxt Yusifzadə məzunları təbrik edərək onlara uğurlar arzulayıb. Akademik tələbələrin burada peşəkar kadrlar kimi yetişdiyini, aldıqları bilik və bacarıqların həyatlarının növbəti mərhələsində böyük rol oynayacağını bildirib.
Daha sonra təhsil nazirinin müavini Firudin Qurbanov çıxış edərək Bakı Ali Neft Məktəbinin qısa müddət əvvəl fəaliyyətə başlamasına baxmayaraq böyük uğur və nüfuz qazandığını diqqətə çatdırıb. Nazir müavini fərqlənmə diplomu ilə bitirən məzunların sayına görə bu təhsil ocağının yüksək göstərici əldə edərək ölkənin ali təhsil müəssisələri arasında seçildiyini vurğulayıb.
Çıxışının sonunda təhsil nazirinin müavini məzunları təbrik edib və onlara gələcək fəaliyyətlərində uğurlar arzulayıb.
Sonra məzunlar çıxış edərək bu təhsil ocağının məzunu olmaqdan qürur hissi keçirdiklərini deyib, gənc mütəxəssis kimi yetişmələrində, bilik və bacarıqlarının formalaşmasında böyük əməyi olan fədakar müəllimlərinə təşəkkürlərini bildiriblər.
“Məzun günü” diplomların təqdimolunma mərasimi ilə davam edib.
Daha sonra 2022-ci ilin məzun buraxılışı üzrə Bakı Ali Neft Məktəbinin birincisi olan kimya mühəndisliyi ixtisasının tələbəsi Jalə Məmmədova adını rəmzi kötüyə həkk edib.
Tədbir əməkdar artist, tarzən Şəhriyar İmanov və ansamblının, həmçinin “Merry Band” qrupunun ifasında konsert proqramı ilə davam edib.
Qeyd edək ki, 2021-2022-ci tədris ili üzrə Bakı Ali Neft Məktəbindən 107 bakalavr, 61 magistr məzun olur.