Xaçmaz rayonunda direktor, direktor müavinləri və ibtidai sinif müəllimləri ilə sertifikatlaşdırma prosesinə dair məlumatverici görüş keçirilib.
Tehsilyenilikleri.az xəbər verir ki, Quba-Xaçmaz Regional Təhsil İdarəsinin müdiri Rüfət Hacıyev sertifikatlaşdırma prosesinin əhəmiyyətindən, proseslə bağlı görülən dəstək tədbirlərindən danışıb, təhsilverənlərə uğurlar arzulayıb.
Rüfət Hacıyev idarəyə tabe olan ümumi təhsil müəssisələrinin müəllimləri üçün Quba rayonunda sertifikasiyaya dəstək mərkəzinin yaradıldığını bildirib.
Görüşdə Təhsil Nazirliyinin İnsan resursları şöbəsinin əməkdaşı Tükəzban Quliyeva təhsilverənlərin sertifikatlaşdırılması prosesi ilə bağlı çıxış edib, sertifikatlaşdırmanın təkcə qiymətləndirmə deyil, həmçinin təhsilverənlər üçün peşəkar inkişaf aləti olduğunu vurğulayıb.
Təhsil İnstitutunun ibtidai təhsil üzrə təlimçisi Vəfa Məmmədova sertifikatlaşdırmanın mərhələləri, məzmunu ilə bağlı məsələlər barədə fikirlərini bölüşüb, metodika üzrə nümunə test tapşırıqlarını izah edib.
Tədbirdə görüş iştirakçılarını maraqlandıran suallar cavablandırılıb.