ADA Universitetində “Elmi nəşrlərlə bağlı beynəlxalq reytinq göstəricilərinin yaxşılaşdırılması ilə əlaqədar 2022-ci il üzrə Yol Xəritəsi”nin təqdimatına dair tədbir təşkil olunub.
Tehsilyenilikleri.az saytı xəbər verir ki, tədbirin təşkilində məqsəd Yol Xəritəsində qeyd olunan tədbirlərin vahid və əlaqələndirilmiş şəkildə həyata keçirilməsi, qarşılıqlı müzakirəsi və ictimai məlumatlılığı təmin etməkdir.
Tədbirdə Biznes Mühiti və Beynəlxalq Reytinqlər üzrə Komissiyanının Katibliyinin, Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin, Təhsil Nazirliyinin, Milli Elmlər Akademiyasının, Azərbaycan Respublikasının Prezidenti yanında Ali Attestasiya Komissiyasının, Əqli Mülkiyyət Agentliyinin, Azərbaycan Respublikasının Prezidenti yanında Elmin İnkişaf Fondunun, eyni zamanda müxtəlif universitetlərin, beynəlxalq bazalarda indekslənən Azərbaycan jurnallarının, özəl şirkətlərin nümayəndələri və müstəqil ekspertlər iştirak ediblər.
Tədbirdə çıxış edən təhsil nazirinin müavini Firudin Qurbanov qeyd edib ki, bilik iqtisadiyyatı və innovasiya cəmiyyəti ilə xarakterizə olunan qloballaşan müasir dünyada davamlı və hərtərəfli inkişafın təmin edilməsində elm və təhsilin rolu sürətlə artmaqdadır. Məhz bu səbəbdən elm, təhsil və innovasiyaların inkişafı ölkəmizdə dövlət siyasətinin əsas prioritetlərindən birini təşkil edir.
Azərbaycanın ali təhsil sistemində elmin davamlı inkişafına nail olunması, universitetlərin beynəlxalq elmi bazalara çıxışının asanlaşdırılması, tələbə, magistrant, doktorant və alimlərimizin elmi məqalələrinin nüfuzlu beynəlxalq nəşrlərdə dərc olunmasına dəstək göstərilməsi istiqamətində atılmış mühüm addımları vurğulayan Firudin Qurbanov bildirib ki, Azərbaycan Respublikasında elm və təhsil müəssi¬sələrinin 2016-cı ildən başlayaraq dünyanın aparıcı elmi-metrik bazası olan “Web of Sayns”-ə çıxışı, yerli alim və tədqiqatçıların gərgin əməyi nəticəsində elmi məhsuldarlıq nəzərə çarpacaq dərəcədə artıb və elmi tədqiqat işlərinin effektivliyi xeyli yüksəlib.
Nazir müavini deyib ki, bu gün tədqiqat fəaliyyəti universitetlər üçün davamlı rəqabətin həlledici amillərindən birinə çevrilib.
Bunları nəzərə alaraq, 2021-ci ilin sentyabr ayında Təhsil Nazirliyi və QS (Quacquarelli Symonds) reytinq agentliyi arasında qarşılıqlı əməkdaşlıq haqqında müqavilə imzalanıb. İmzalanmış sənədə uyğun olaraq, Azərbaycanın qabaqcıl universitetləri akademik nüfuzun, işə götürənlər arasında reputasiyasının, nəşr fəallığının, beynəlmiləlləşdirilmə və onlayn mühitdə iştirak strategiyasının formalaşdırılması imkanını verən QS (Quacquarelli Symonds) agentliyinin ekskluziv məlumatlarına və analitik informasiyasına giriş əldə edəcəklər. Hazırda sözügedən əməkdaşlıqla bağlı işlər davam etdirilir.
Beynəlxalq rəqabətliliyin artırılması istiqamətində Azərbaycanın uğurlarını sadalayan Firudin Qurbanov əlavə edib ki, ölkəmizdə tədqiqat universitetlərinin fundamental və tətbiqi elmi tədqiqatlar aparmaqla yanaşı, yüksək texnologiyalara əsaslanan elm tutumlu sahələrin kadr və elmi-informasiya təminatının həyata keçirilməsi nəzərdə tutulub. Ali məktəblərimizin tədqiqat universitetinə çevrilməsi, təbii ki, onların beynəlxalq reytinqini də yüksəldəcək. Eyni zamanda, ali məktəblərə bu status verildikdən və müvafiq normativ-hüquqi baza yaradıldıqdan sonra onlar istər hökumət, istərsə də sənaye və biznes ilə işgüzar kommunikasiyanın qurulmasında daha çevik və qətiyyətli olacaqlar.
Tədbirdə vurğulanıb ki, Biznes Mühiti və Beynəlxalq Reytinqlər üzrə Komissiyanının sədri tərəfindən cari ilin mart ayında təsdiq edilmiş Yol xəritəsi elmi nəşrlərlə bağlı mövcud resurs və müxtəlif sektorları əhatə edən təşəbbüs paketləri əsasında hazırlanıb.
Bildirilib ki, Yol Xəritəsinin icrası çərçivəsində elmi potensialın inkişafı üzrə prioritetlərin reallaşmasında dövlət qurumları ilə yanaşı, özəl sektor nümayəndələrinin, vətəndaş cəmiyyəti institutlarının, elm və təhsil müəssisələrinin aktiv və koordinasiyalı iştirakı ilə vahid sinerjinin yaradılması olduqca əhəmiyyətlidir. Bu sahədə qəbul edilən dövlət proqramları və bu gün təqdimatı keçirilən Yol Xəritəsi çərçivəsində elmin inkişafının təşviqinin önəmi xüsusilə vurğulanıb. Təşviq mexanizmlərinin genişləndirilməsi, özəl sektor tərəfindən araşdırma və təkmilləşdirmələrə investisiya qoyuluşununun artırılması Azərbaycanın qlobal dəyər zəncirinə qoşulmasının sürətləndirilməsinə özünəməxsus təkan verəcəkdir.