“Çağdaş Təhsil” jurnalının kollektivi “Təmiz Dünya Qadınlara Yardım İctimai Birliyinin nəzdində fəaliyyət göstərən Qadın və Uşaq Sığınacaq evinə baş çəkib. Noyabrın 14-də baş tutan yardım aksiyası yardımsevər kollektivin şəxsi təşəbbüsü ilə reallaşıb. Sığınacağda məskunlaşan bütün yaş kateqoriyalarına aid uşaqlarla baş tutan görüş xoş anlarla yadda qalıb. Yardım askiyası çərçivəsində redaksiya kollektivi özləri ilə birlikdə gətirdikləri hədiyyə paketlərini fərdi şəkildə uşaqlarla görüşərək şəxslərinə hədiyyə ediblər. Belə bir gözəl təşəbbüsdən, anım mərasimindən sevinən sığınacaq kollektivi və sakinləri öz növbəsində kollektivə təşəkkürünü bildirib, yada salınması, ziyarət edilməsindən dolayı sevincək olduqlarını dilə gətiriblər. Keçirilən görüş redaksiya heyəti üçün də çox maraqlı anlarla unudulmaz olub. Belə ki, gül balaların görüşünə gəlmək, hədiyyələrini təqdim etmək, onlarla həmsöhbət olmaq, keçirilən dərsləri ilə yaxından maraqlanmaq və sığınacaqdakı durumları haqqında məlumat almaq kollektivin də ürəyincə olub. Yardım aksiyası sonda hər iki kollektivin birgə çəkilmiş xatirə şəkli ilə əbədiləşdirilib. Məlumat üçün bildirək ki, hazırda “Təmiz Dünya Qadınlara Yardım İctimai Birliyinin nəzdində fəaliyyət göstərən Qadın və Uşaq Sığınacaq evində 60 uşaq və ana məskunlaşıb. Ümumilikdə isə 10 yaxın sosial və texniki işçi sığınacaqda çalışır. Sığınacağa tez-tez baş çəkənlərin olması bütün kollektivin və sığınacaq sakinlərinin sevinc səbəbidir ki, məhz bu məqsədlə yola çıxan “Çağdaş Təhsil” jurnalının yardımsevər kollektivi belə xoşməramlı görüşləri davam etdirəcəyini növbəti xeyriyyə məqsədli lahiyələrin davamlı olacağına söz verib.
