Bakıda Uşaq-Gənclər Rəsm Qalereyasında “Sehirli fırçam” adlı fərdi yaradıclıq sərgisi keçirilib. Gənclərin Respublika Bədii Yaradıcılıq evinin təşkilatçılığı ilə keçirilən sərgidə həmin evin istedadlı yetirməsi olan, 40 saylı Laçın rayon tam orta məktəbin 6-cı sinif şagirdi Məhərrəmzadə Ayanın əl işləri nümayiş olunub. Sərgi baş çəkən qonaqlar tərəfindən maraqla qarşılanıb. İki yaşından etibarən rəsm çəkərək öz parlaq istedadını aşkarlayan məktəbli istedadlı fərdi yaradıcılıq sərgisində ümumi 64 əl işini nümayiş etdirib. Rəsmi açılış mərasimi ilə başlayan sərgi ardınca təşrif buyuran qonaqların ixtiyarına verilib. Qonaqlar salon boyunca nümayiş etdirilən rəsmlərə baxış keçirib, 11 yaşlı Ayanın yaradıclıq dünyasına, əl işləri ilə daha yaxından tanış olublar. Sərgidə əsasən Ayanın məktəb kollektivi, yaxınları, müəllimləri, ziyalılar, incəsənət xadimləri və rəssamlar iştirak edib. Sərginin hörmətli qonaqları arasında Azərbaycan Dövlət Mədəniyyət və İncəsənət Universitetinin Dizayn və dekorativ tətbiqi sənət kafedrasının müdiri, professor, xalq rəssamı, şöhrət ordenli Arif Əziz , eyni universitetin Təsviri sənət kafedrasının müdir əvəzi, baş müəllim rəssam Rəşad Cabbarov, həmin kafedranın baş müəllimi, rəssam Fəxrəddin Qəhrəmanlı, eləcə də tədbir təşkilatçıları olan Gənclərin Respublika Bədii Yaradıcılıq evinin rəhbəri Məhəmməd Novruzov, Yaradıcılıq evinin şöbə müdürü Kəmalə Muradlı , Ayanın rəsm müəllimi Sevda İsayeva və Rəssamlar İttifaqından Aygün və Elnurə İsgəndərovalar da olub.
Çıxış edən hər bir qonaq keçirilən ilk rəsm sərgisindən dolayı sərgi qəhrəmanının əl işlərini yüksək qiymətləndirərək ona gələcək yaradıcılıq həyatında uğurlar diləyiblər. Gələcəkdə tanınmış və peşəkar rəssam olmağı qarşısına əsas məqsəd qoyan Ayan bala çox erkən yaşda bu istedadı özündə aşkarlayaraq indiyə qədər çoxlu sayda maraqlı və rəngarəng rəsm əsərləri yaradıb. Əsasən fırçasını realizm janrında sınayan balaca rəssam 5 yaşından etibarən Gənclərin Respublika Bədii Yaradıcılıq evinin Gənc Rəssamlar dərnəyində təhsil alaraq rəssamlıq sənətinin bütün incəliklərinə və yaradıcılıq tərəflərinə daha yaxından bələd olur. Onun gələcəkdə rəssamlıqla bağlı böyük planları var. Bu sənətə səmimi qəlbdən bağlı olan müsahibim öz yardıcılıq potensialı və özünəməxsus istedadı ilə gələcəkdə fərdi rəssamlıq məktəbinin banisi olmaq niyyətindədir. Yəni özündən sonra bir yaradıcılıq məktəbi, fərqli istedad izi qoymaq istəyi ilə yaşayır.
Star kids modeli, bir çox sərgilərin iştirakçısı və qalibi olan Ayan Məhərrəmzadənin ilk sərgisidir bu. Təbii ki, müsahibimiz həyəcanlı olduğu qədər sərgiyə çıxartdığı əl işlərindən dolayı çox sevinclidir. Əsasən peyzaj, portret və natürmot mövzularına üstünlük verən Ayan təbiətə, al-əlvan rənglərdən dolayı sevimli payız fəslinə çox bağlıdır. Boyalar qədər rəngarəng dünyası olan müsahibim təbiət qoynunda xoş vaxt keçirməyi və onu müşahidə edərək nəzərəçarpan görüntülərini öz mənzərələrində əks etdirməyi çox sevir. O, sol əli yaratdığı sənət əsərlərinə böyük ürək, dərin düşüncə və ruh yüksəkliyi qoyur. Həyat eşqi və yaradıcılıq sevgisi ilə döyünən müsahibim daha çox yaradıb, sərgi keçirmək istəyindədir. Ona daim dəstək olan valideynləri də Ayan balanın uğur və nailiyyətlərinə çox sevinir.
Rəsm sərgisi ümumi baxışdan sonra qonaqların sərgi müəllifi ilə fərdi söhbəti və xatirə şəkli çəkdirməsi ilə davam edib. Yekunda Gənclərin Respublika Bədii Yaradıcılıq evi tərəfindən “Fəxri Diplom”a layiq görülən Ayan bala tədbir təşkilatçılarına və iştirakçılarına öz təşəkkürünü bildirib. Rəsm sərgisi ədəbi-bədii hissə ilə sona çatıb.
Jurnalist Aybəniz Abdulova