Tanınmış kimyaçı alim, Əməkdar elm xadimi, uzun illər Bakı Dövlət Universitetinin “Ekoloji kimya və ətraf mühitin mühafizəsi” elmi-tədqiqat laboratoriyasına rəhbərlik etmiş akademik Rəfiqə Əliyevanın doğum günü münasibətilə universitet kollektivi Fəxri xiyabana gələrək onun xatirəsini yad edib, məzarı önünə əklil qoyub, gül dəstələri düzüblər.
Azərbaycanın kimya elmində özünəməxsus iz qoymuş Rəfiqə Əliyeva 1964-cü ildən ömrünün sonuna qədər Bakı Dövlət Universitetinin Analitik kimya kafedrasında işləyib. 450-dən artıq elmi əsərin, 25 dərslik və dərs vəsaitinin, 20 patentin müəllifi olmuş akademik ömrünün böyük hissəsini BDU-da ixtisaslı kadrların hazırlanmasına sərf edib.