Dövlət qulluqçularının etik davranış qaydaları haqqında 2023-cü il üzrə hesabat hazırlanıb.
Bu barədə Dövlət İmtahan Mərkəzindən məlumat verilib.
“Dövlət qulluqçularının etik davranış qaydaları haqqında” Azərbaycan Respublikasının Qanununun 20.2-ci maddəsinə və adı çəkilən Qanunun tətbiq edilməsi barədə Azərbaycan Respublikası Prezidentinin 2007-ci il 16 avqust tarixli Fərmanına uyğun olaraq Azərbaycan Respublikasının Dövlət İmtahan Mərkəzi etik davranış qaydalarına əməl olunmasına nəzarəti nizamnaməsinə uyğun olaraq həyata keçirir.
Eyni zamanda, Azərbaycan Respublikası Prezidentinin 2016-cı il 11 aprel tarixli Fərmanı ilə təsdiq edilmiş “Azərbaycan Respublikasının Dövlət İmtahan Mərkəzi publik hüquqi şəxsin Nizamnaməsi”nə əsasən Mərkəz “Dövlət qulluqçularının etik davranış qaydaları haqqında” Azərbaycan Respublikasının Qanununun müddəalarının pozulması ilə bağlı şikayət və məlumatları qəbul edir, dövlət qulluqçularının etik davranış məsələləri üzrə araşdırmalar aparır, tövsiyələr və məruzələr tərtib edir, onlar tərəfindən etik davranış qaydalarına əməl edilməsi vəziyyətini öyrənir, bu barədə məlumatları ümumiləşdirir və yol verilmiş pozuntu halları barədə Azərbaycan Respublikasının Prezidentinə məlumat verir.
Qanunvericiliyə uyğun olaraq, mərkəzi və yerli icra hakimiyyəti orqanları, habelə digər dövlət qurumları tərəfindən etik davranış qaydalarına əməl edilməsi vəziyyətinin öyrənilməsi və bu barədə məlumatların ümumiləşdirilərək təhlil edilməsi məqsədilə Mərkəz tərəfindən müvafiq iş aparılır.
Dövlət İmtahan Mərkəzi tərəfindən “Etik davranış məsələləri üzrə məlumatın təqdim edilmə Forması” hazırlanmış və həmin Formaya uyğun olaraq müvafiq məlumatların Mərkəzə təqdim edilməsi üçün mərkəzi və yerli icra hakimiyyəti orqanlarına, habelə Ali Attestasiya Komissiyasına, Audiovizual Şuraya, Məhkəmə-Hüquq Şurasına, Hesablama Palatasına, İnsan Hüquqları üzrə Müvəkkili (Ombudsmana) Aparatına, Baş Prokurorluğa və Əqli Mülkiyyət Agentliyinə məktublar göndərilib. Qeyd edilən qurumlar tərəfindən etik məsələlər üzrə təqdim edilmiş məlumatlar təhlil edilib, ümumiləşdirilib və müvafiq hesabat hazırlanıb.
Ümumilikdə hesabat dövründə “Dövlət qulluqçularının etik davranış qaydaları haqqında” Azərbaycan Respublikasının Qanununun müddəalarının tələblərini pozan 341 dövlət qulluqçusu barədə intizam tənbeh tədbiri tətbiq edilib. Həmin intizam tənbeh tədbirlərindən 162-si mərkəzi icra hakimiyyəti orqanları və digər dövlət qurumlarında, 179-u isə yerli icra hakimiyyəti orqanlarında qulluq keçən dövlət qulluqçuları barədə tətbiq edilib.