Azərbaycan Gənc Alim, Doktorant və Magistrlər Cəmiyyətinin Elm və Təhsil Nazirliyinin dəstəyi ilə həyata keçirdiyi “Ali təhsil müəssisələrində transdisipinarlıq strategiyaları ilə maarifləndirmə fəaliyyətinin təşkili” adlı layihə çərçivəsində Bakı Mühəndislik Universitetində ilk seminar keçirilib.
Cəmiyyətdən bildirilib ki, seminarda universitetinin magistratura və doktorantura şöbəsinin müdiri texnika elmləri doktoru, professor Mahir Bəşirov layihənin ali təhsil müəssisələrində biliyin istehsalı prosesində əsas dəyişikliklərin tədqiqini və təşviqini təklif etdiyini söyləyib.
Azərbaycan Gənc Alim, Doktorant və Magistrlər Cəmiyyətinin eksperti Sevinc Ədilova fənlərarası əlaqə və münasibətlərin yenidən qurulması strategiyası, yeni biliklər istehsalının yollarının araşdırılması və bu sahədə dünya ölkələri universitetlərinin təcrübəsinin, habelə fərqli ölkələrdə tətbiq olunan metodların öyrənilməsi, fənlərarası münasibətlər kontekstində yeni düşüncə tərzinə gedən yolun tapılması barədə geniş təqdimatla çıxış edib.
Seminarın yekununda geniş müzakirələr aparılıb, iştirakçılara müvafiq çap materialları və sertifikatlar təqdim edilib.